العقار يعني شقة ؟ والشقة يعني عقار ؟

دي مشكلة ومعضلة في اذهان الناس حالياً ، انه علشان يأمن نفسه بعقار بيتخيل ان العقار ده مجرد " شقة " في حين ان مفهوم العقار أكبر من كدة بكتير !

العقار ممكن يكون :-


  • أرض : و الارض هنا مش لازم تكون مباني لا ممكن ارض زراعية بما انك بتحفظ فلوسك فيها مش هحتاج ومش هتخالف وتبني عليها ، وبتلجأ للنوع ده لو امكانياتك مش سامحة تشتري ارض مباني ، ولكن أفضل من انك تسيب فلوسك كده راكنة .
  • محل تجاري : والمحل التجاري في الغالب سعره بيزيد اكتر من السكني اهم حاجه تختار مكان يكون له مستقبل وعليه حركة وفي وسط مجمع سكني كويس يسمح بده وفرصته في ان سعره يزيد اكتر جايه من ندرته قصاد الشقق السكنيه ، يعني لو عندك ١٠ عمارات في شارع فيهم ١٠٠ شقه مش هيكون فيهم اكتر من ١٠ محلات ... وهكذا
  • مشروعات استثماريه لها حصة عقارية : ودي من أهم شروطها واللي هيميزها عن اي مشروعات تانيه انك تكون شريك فيها ولو قيمة سهمها قليل والشراكة هنا اضمنلك وجود عائد مادي بعد الدراسة المستفيضة طبعاً للمشروع من المتخصصين ، والجزء اللي يهمنا احنا هو امتلاكك في حصة تمليك في العقار المقام فيه المشروع وده بيأمنك من اي خساره في المشروع تجارياً لا قدر الله بيتباع العقار وبيكون زاد سعره زيه زي اي عقار تاني
  • وفي انواع تانيه زي البيوت الصغيرة في القري لو انت من قاطنيها ، او في المدن الجديدة كل حاجه طبعا وسعرها علي حسب امكانياتك أنت ...
المهم تتلافي عيوب العقارات عامه اثناء الشراء علشان لما تحب تبيع : تبيع بسرعه وبدون اي ضغوط ،،، وده اللي هنعرفه في مقال الخميس القادم باذن الله

محمود عبدالشافي