• محمود عبد الشافى
  • 2016-06-30

السمسرة جريمة ؟

اولاً : خلونا نشرح يعني ايه سمسرة الاول

السمسرة هي الوساطة ما بين البائع والمشتري في اي سلعة عقارات او غيرها ، والعملية دي في حد ذاتها مشروعة و مقننة في قانون التجارة المصري و لها ضوابط بيرجع ليها القاضي لو طرح نزاع قدامه

يبقي رقم ١ ( العملية مشروعة )

ثانياً: هل الوظيفة دي مهمة ؟

اؤكد لكم انها مهمة ، ولكن اذا كان ممارستها بحرفية بدون السعي لاي كسب غير مشروع زي فرق السعر ، او بخس التمن او زيادته عن السوق 
اهميتها من انهابتوفر الوقت للمشتري والبائع ، لان الوسيط نقطة وصل الاتنين ، فبتليفون واحد تقدر تنجز مصلحتك

ثالثاً: هل من مصلحتي اشتري عن طريق وسيط ؟

لو تقدر تقوم بتشخيص مرضك او ترسم شقتك بنفسك ، اعمل ده علطول ، والوساطة زيها زي اي مهنه ، لو تقدر تعملها انت بنفسك دون اللجوء للوسيط ، توكل علي الله ، اما لو متقدرش وهتستعين بوسيط ، فده رضاء ضمني بكل شروط العملية من حيث تكاليفها و ادابها 
واكيد اه من مصلحتك لو تعرف وسيط تثق فيه انك تشتري او تبيع عن طريقه ، هيوفر عليك حاجات كتير فوق مانت متخيل

رابعاً: اختار ازاي وسيط ؟

مفيش غير السوق والمعاملات الطيبة اللي نفذها الوسيط هي اللي هتدور عليها ، و المعاملات الطيبة هنا مش المقصود بيها تختار صاحبك ... لا ، انت تختار صاحب الثقة في التثمين و انهاء المعاملة للاخر بدون اي مشاكل ويحل اي خلاف في النص ما بين الطرفين .. واكيد حبذا لو كان صديقك

خامسا: في مقدار محدد للعمولة ؟

العمولة بتبدأ من ١٪ : ٢،٥ ٪ حسب سعر العقار ، وكلها امور اتفاقية يجوز تحت او فوق ، المهم الاتفاق وقت العرض علي الوسيط وطلب الخدمة علشان تلافي المشاكل ، مش بعد ما ينجز مهمته او حتي في النص

سادسا: عيوب السمسرة ؟

  • للأسف ، عيوبها كتير مش من الوظيفة او المهنة ، لا من الناس اللي بتمتهنا ، ود اهم العيوب- هتلاقي اللي بيعمل فرق سعر في التمن
  •  هتلاقي اللي عاوز يخطف ويجري ، هو كل همه انها تتم وياخد عمولته وملوش دعوه 
  •  طريقة تعامل البعض بطريقة فظة ومنفره بتكره وكرهت الناس في كلمه سمسار خصوصاً معظم البوابين وحراس العقارات سماسرة

يبقي تتلافي العيوب دي باللي قولنا عليه فوق ، حد له سٌمعة يخاف عليها ، ويكون معاك من اول المعاملة لاخرها وبعدها كمان

وخد دي حلقة في ودنك " مش المطلوب انك تختار وسيط يكون في صفك ، المطلوب انه يكون مٌنصف "

‫#‏محمود_عبدالشافي